ඇත්තම කියනවනම් මම මේක ලියන්න කියල හිතාගෙන හිටියෙ අපේ මොකක් හරි මුද්‍රිත මාධ්‍යයක් හරහා... ඒත් ඉතින් එහෙම එකක් ලීවට පළකරන අවස්ථා මොහොම දුලභ නිසා මෙච්චර කල් හිටිය... මොකද මේ දවස් වල උණු කැවුම් වගේ විකිනෙන්නෙ කාට හරි ගහපු එකක්, නැත්නම් විරිත්තන මූණක්... එහෙමත් නැත්නම් "අරය කරපු නැති එක මම කරනව" කියල කවුරු හරි ඇද බාපු බේගලයක් මිසක් මෙහෙම ලිපියක් ලීවොත් ඉඩක් දෙන්න බයයි කවුරුත්...
කමක් නෑ... හිතේ තියෙන දෙයක් මෙහෙම ලියල, අඩුම ගානෙ මම වගේ හිතන එකෙක් හරි කමෙන්ට් එකක් දායිනෙ.. ඒක කියවල හිත හදා ගන්නව..
දැන් ලියවැල් නැතුව කතාව ලියන්නම්...
අද (2011-03-06) මොකක් හරි සති අන්ත පුවත් පතක කාටුන් ශිල්පියෙක්ගෙ කාටුන් එකක් තිබුනලු අපෙ පුද්ගලික අංශෙ බස් රථ වල නලාව ගැන..අහම්බෙන් වගේ එක නාලිකාවක පත්තර මල්ලි කෙනෙක් ඒක කියවනව මට ඇහුන....
දැන් ඉතින් ඔයාලට හිතා ගන්න පුලුවන් වෙයි මම මොකද්ද කියන්න හදන්නෙ කියල...
අනේ දෙවියනේ, ගැමුණු විජේරත්න සහෝරයටනම් මේක කියවන්න වෙලාවක් නොතිබෙත්වා කියල ප්‍රාර්ථනා කරනව.. මොකද බැරි වෙලාවත් එයා මේක කියෙව්වොත් හෙට සති අන්තෙට ගෙදර ඇවිත් අයේ වැඩට යන්න ඉන්න අය මට සාප කරයි... මොකද ඒ සහෝදරයට එයාගෙ සහෝදර කැල ගැන තියෙන්නෙ පුදුම කැක්කුමක්නෙ.. ඉතින් ඒ සහෝදර කැක්කුම උත්සන්න වෙන්න පුලුවන් මේක කියෙව්වොත්...
අනේ ඉති ඔය කැක්කුම වටපිටාව, මගී ජනතාව කොටින්ම කීවොත් "අපි" ගැන තියෙනවනම්, අද මම උනත් බැරි බැරි ගාතෙ සිංහල කොටන්න ඕනෙ නෑනේ..
කමක් නෑ, මගේ ප්‍රර්ථනාව එලෙසම ඉටු වේවා කියල හිතාගෙන මේක ලියමු..
මේක කියවන ඔයාල හැම කෙනෙක්ම ජීවිතේ එක වතාවක් හරි අපේ රටේ පුද්ගලික බස් රථයක ("මග මරුවා නොහොත්" ලංකා අශොක් ලේලන්ඩ් බස් රථයක) ගමනක් ගිහින් තියෙනවටනම් සැක නෑ.. මමනම් ඉතින් මදි නොකියන්න ඒවයෙ ගමන් ගිහින් තියෙනව..
අනේ ඉතින් අපරාදෙ කියන්න බෑ, ඒ මතෘකාව ගැන ලියනවනම්, වෙනමම බ්ලොග් එකක් ලියන්න පුලුවන්... දවසට එක පෝස්ට් එක ගානෙ ලීවත් ඉවර වෙන්නෙ නැති වෙයි.. ඒ නිසා ඒ අසාර්ථක උත්සාහය දරන්න යන්නේ නෑ මම...
මේ මගමරුවගෙ ගමනක් ගියෙ නැත්නම් තමන්ගෙ වාහනයක ගමන් බිමන් යන කෙනෙක් උනත් මම කියන්න යන දේ නම් අනිවර්යෙන්ම වටහගෙන ඇතුවාට කිසිම සැකය නෑ.. සමහර විට බස් එකේ යනවට වඩා එහෙම තමන්ගෙ වාහනේ ගමන් යන අයට මේ අත්දැකීම හොඳට ඇති..
සාමාන්‍යයෙන් වාහනයක් දුවන්න ධාවනයට සුදුසු වාහනයක්, ඉන්ධන, රියදුරෙක් ඕනෙ වෙනව. බස් රථයක්නම් කොන්දොස්තර කෙනෙක් ඕනෙ වෙනව... ඒත් මේ විශේෂ මගමරුවා ධාවනයටනම් ඊට වඩා දේවල් ඕනෙ.
1. මහ මග ගමන් ගන්නා පදිකයින්, අනෙකුත් වාහන බිය ගැන්වීමට සමත් හොඳ හඬ ඇති නලාවක්. (මෙය අනිවාර්ය වේ.. මෙය නොමැතිව රථය මර්ගයේ ධාවනය කල නොහැක)
2. රථය ධාවනයට සුදුසු විය යුතුම නොවේ.
3. සුක්කානම කැරකැවීමට බලපත්‍රයක් (රේඩියෝ වුවද කම් නැත) සහිත පුද්ගලයෙක් (මාර්ග නීති දන්නා රියදුරෙකු නොවිය යුතුය)
4. මාර්ගයේ යන එන වාහන හැසිරවීමට, රථයේ ඉදිරිපස කොටස හැරවීමට සහ සිග්නල් දැමීමට අයෙක් (හාල් කෑල්ල - ගමන සහ කෑම වේල වෙනුවෙන් සේවය සපයන රැකියාවක් නැති, නූගත් අයෙක්)
5. තිත්ත කුණුහරප දන්නා කොන්දොස්තර වරයෙක් (ඉලක්කම් එකතු කිරීමට පමණක් හැකි, මනුස්ස කම් නොදන්නා අයෙක්)
අපේ රටේ පුද්ගලික අංශයේ මගී ප්‍රවාහන බස් රථ බහුතරයක් (99% පමණ) දකින විට, ඉහත කරුණු 5 සම්පූර්ණ නොවන වාහන සඳහා මාර්ග බලපත්‍ර නිකුත් නොකරන්නේදැයි සැකයක් නැගෙනව.
(මේක කියවන අය මට සමවෙන්න ඕනෙ.. මතෘකාවෙන් පිට පනින්න හදනවට.. මොකද ප්‍රයිවට් බස් ගැන කියනකොට මගෙ ඇඟේ ලේ රත් වෙනව. කරන තරමක් කරන්නෙ අලිගුත්තේරු වැඩනෙ. රුපියලට දෙකට මිනී මරණ ජාතියක් තමයි ප්‍රයිවට් බස් කියන්නෙ.. ඒකටම හරියන නීතිය රකින නිල ඇඳුම් අඳින පිරිසකුත් ඉන්නවනෙ අපේ රටේ වැරදි දැක දැක ඇස් පියගෙන ඉන්න... මම ඒක වගකීමෙන් කියනව. මොකද ඕනෙනම් ඒ අයගෙ හඳුනාගැනීමේ අංක,අදාල බලප්‍රදේශත් එක්කම කියන්න පුලුවන්...පහුගිය දවසක ඒ වගේ පැමිණිල්ලක් කලාම ටිකක් වගකිවයුතු නිලධාරියෙක්ට මට ලැබුන උත්තරේ තමයි, "මහත්තය ඉන්නකො... අපි බලාගන්නම් නීතිය.." 119 කතා කලාම රා‍ජ්‍ය සේවා කොමිසමට කතා කරන්නලු.. ඒකෙ මට ලැබුන අංකෙ පහුගිය සතියම රින්ග් වෙනව විතරයි. කතා කරන්න කෙනෙක් නෑ. ඔන්න ඕකයි තත්වෙ)
දැන් අයෙම අපේ කතාව ලියමුකො...
මම අහල තියෙන විදියටනම්, පරිසර දූෂණයෙ එක කොටසක් තමා ශබ්දය මගින් සිදු කෙරෙන දූෂණය. වායු දූෂණය, ජල දූෂණය මෙන්ම වැදගත් දෙයක් තමයි ශබ්ද දූෂණය. ඉතින් ඒ හේතුව නිසාමදෝ කුමන හෝ අවස්ථාවක ශබ්ද විකාශණ යන්ත්‍ර භාවිතයේදී අපි බලපත්‍රයක් ලබා ගතයුතු වෙනවා. එය එසේ වෙද්දී බලපත්‍ර නැති ශබ්ද විකාශණ යන්ත්‍ර ඇල්ලීමේ බලයද පොලිසිය සතුයි.
අවාසනාවක මහත කොච්චරද කියනවනම්, ඒ බලය නිකරුනේ තම නලාව හඬවන රියදුරන් ඇල්ලීමට නොතිබීමයි. තම රථයේ ඇක්සලරේටරය පාගනවාට වඩා හයියෙන්, නලාව පෑගීම වැදගත් බව සලකන රියදුරන් ඇල්ලීමට නොයෙදීමයි. අර මම කලින් කීව වගේ ඔය බස් රථ දුවන්නෙ ඔය නලාවයි, අර ඉස්සරහ යන හාල් කෑල්ලයි හින්ද කියලයි එයාල හිතගෙන ඉන්නෙ.. ඉස්සරහෙන් යන වාහනෙ බය කරල නලාව හඬවපුවම හාල් කෑල්ල ඒ වහනෙ අයින් කර ගන්න උපදෙස් දෙනව. එතකොට බස් එක නිකන්ම ඉස්සරහට යනව. ඕක තම ක්‍රමේ.
කොච්චර දිගට පෝලිමක් තිබුණත්, පාරෙ යන්න බැරි විදියට හිර වෙලා හිටියත් එයාල හිතාගෙන ඉන්නෙ එයාලගෙ නලාව කන පැලෙන්න ගැහුවම ඒ ඔක්කොම බාධක මග ඇරෙනව කියල..
අනේ අම්මප ඒ වෙලාවට කෙනෙක් නෑනෙ ඔය කන පැලෙන්න නලාව ගහන එකාගෙ කන පැලෙන්න එකක් ගහන්න ආයෙ මතක තියෙනකල් නලා නොගහන්න.
සමහර රටවල් වල වාහන දුවන විදිය දැක්කම ඇත්තටම සැකයි ඒවයෙ නලාවක් නැද්ද කියල. අනේ අපරාදෙ කියන්න බෑ ඒකට අපේ අය... විදුලි අලෝක පුවරුවෙ (කල‍ර් ලයිට්) රතු පාට තියෙද්දිත් නලාව පාගනව. ඒ තරම් නීති ගරුකයි.
නිකන් හිතල බලන්න මේක කියවන ගමන්, බොරැල්ල හන්දියෙ රතු එළියට නවත්තල ඉන්නකොට කන පැලෙන නලා ශබ්ද කීයක්නම් ඇහෙනවද..? ඒත් එතන අනිවාර්යෙන්ම පොලිස් නිලධාරියෙක් ඉන්නව සේවයෙ යෙදිල. එක්කො එයා බීරෙක්. එහෙමත් නැත්නම් අර කම්මලේ බල්ලට වෙච්ච දේ එයාටත් වෙලා.
කුරුණෑගල නගරය මැද්දෙ තියෙන ප්‍රධාන බස් නැවතුමට ටිකකට ගියොත් ඕනෙම වෙලාවක, ඕනෙම කෙනෙක්ට මම කියන දේ තේරෙයි. ඒකෙ ඉන්න බස් රථ රියදුරන් නලාවෙන්මයි බස් දුවන්නෙ. සමහර වෙලාවට එක දිගට විනාඩිය දෙක නලාව හඬවන්නෙ හරියට ගෙදර ඉන්න අය ගෙන්න ගන්න වගේ. අනේ ඉතින් ඒක අහන අපි ඒ අයගෙ දෙමව්පියන් සිහිකරනව ඇරෙන්න නිකමට වත් කනක් අත ගාන්න පුලුවන්ද..? අඩුම ගානෙ පොලිස් නිලධාරියෙක්ට පුලුවන්ද පියවරක් ගන්න.. එහෙම කලොත් ඉතින් අර අහවලාගෙ සහොදර කම උත්සන්න වෙනවනෙ.. ඉතින් අන්තිමේ වෙන්න අහින්සක මගියො දුක් විඳින එකනෙ.
අනේ ඉතින් ඇයි කිසිම කෙනෙක් හිතන්නෙ නැත්තෙ මේකෙන් අපිට වෙන හානිය ගැන.. අපේ පරිසරයට, අපේ කනට වෙන හානිය ගැන..
අම්මප ගුවන් යානයක යද්දිත් ශබ්දෙ දරාගන්න බැරි අයට කන් වලට ගහගන්න දෙනව ඇබ. මේ විදියට ගියොත්, අපිටත් වෙන්නෙ එදිනෙදා ජීවිතේදි එලියට බහිනකොට "බීරි මාක් කනේ මූඩි කුට්ටමක්" පළඳින්න. එහෙම නොවුනොත් වැඩි කල් නොයා අපි බීරො වෙනව.
මොකද අපි ඉනිනෙ "තමාගෙ යහපත තමා විසින්ම සලසා ගතයුතුය" යන තේමාව පෙරටු කරගත් සමාජයකනෙ..
මේක කියවනවනම් නීතිය දන්න කෙනෙක් මාව නිවැරදි කරන්න. මම දන්නෙ නෑ අපේ රටේ එහෙම නීතියක් තියෙනවද කියල අනවශ්‍ය විදියට නලා හඬවන අය අල්ලන්න පුලුවන්.
අනේ ඒත් දෙවියන්ගෙ නාමෙට එහෙම දෙයක් ගේන්න පුලුවන්නම්... එහෙම උනොත්, අපේ පරිසරයට වෙන හානිය, අපේ කන් වලට වෙන හානිය නැති කරගන්න පුලුවන් වේවි.
කඩේ ගන්න නානාවිද නලා තියෙනව කිසිම ප්‍රමිතියක් නැති ... අපේ අයියල ඒවා අරන් හයි කර ගන්නව අනිත් එකාගෙ නලාවට වඩා හයියෙන් ඇහෙන්න. එහෙමයි රේස් දුවන්නෙ.
මනුස්සයෙක් හැප්පිල මැරුණට පස්සෙ නඩු දාල වන්දි ගෙවුවට, හිර කරාටම මදි.
කාට හරි පුලුවන් කමක් තියෙනවනම් නිකරුනේ නලා ගහන අය අල්ලල නඩු දාන්න පුලුවන් නීතියක් හදන්න, පරිසරයට අහිතකර නලා විකිණීම, මිලදී ගැනීම සහ සවි කිරීම තහනම් කරන්න පුලුවන් නීතියක් හදන්න... අන්න ඒ උත්තමය දෙවියෙක් වෙයි.
මට මතක් වෙනව මගෙ යාලුවෙක්ගෙ තිබුන එක් සුන්දර, අහින්සක හීනයක්.. මම දන්නව ඒක සදාකල් හීනයක්ම විතරයි කියල... ඒත් ඒ අහින්සක,සුන්දර හීනෙ පිටිපස්සෙ බරපතල යථාර්තයක් තියෙනව... එයාගෙ හීනෙ තමයි,
"කවද හරි දවසක එයා රටේ ජනාධිපති වගේ වගකිවයුතු නිලයක් දැරුවොත් අන්න එදාට ඔය කියන අසික්කිත, විනයක් නැති බස් රථ අපේ රටේ තහනම් කරන එක."
අනේ ඒ හීනෙ යථාර්තයක්ම වෙනවනම්, දෙවියනේ කියල අපිටත් කනක් ඇහිල පාරෙ බැහැල යන්න පුලුවන් වෙයි.. අපි අවට පරිසරයට වින කරන එක සාධකයක් හරි
අපේ රටෙන් තුරන් වේවි එදාට.....!
වැඩක් නෑ මේවා ගැන කතා කරලා.. සහතික ඇත්ත..
ReplyDeleteමේකට ඔය මඟ මරුවෝ කරන මම දැකපු තව පොඩි දෙයක් එකතු කරන්නම්. ඒ තමයි ඔය මිනිස්සු මූණට වාහනයක් එද්දිත් ඔහේ ඉස්සර කරනවා. මූණට එන වාහනේට හෙඩ් ලයිට් ගහනවා. ඉතින් අර ඉස්සරහ එන මනුස්සයට කාණුවකට හරි වාහනය දාලා ඒක බේරගන්න වෙනවා. ඔය ලයිට් ගැහිල්ලට ඔය මීහරක් ඩ්‍රයිවර්ලා කියන්නේ පාර ලොකු කරනවා කියලා.මතක් වෙද්දිත් ලේ පිච්චෙනවා.
ReplyDelete